Spiritello dispettoso

Tempo di lettura stimato: 2 minuto/i

Il monacello, ossia lo spiritello dispettoso in abiti monacali. Un personaggio tipico della fantasia napoletana che, per antipatia o per simpatia, era cattivello o generoso secondo le circostanze. Spesso, dietro questa figura nata dall’immaginazione, si nascondevano in realtà focosi personaggi reali che erano legati a vicende amorose non proprio lecite ….

‘O Munaciello

Quann’’a miseria,’nfama pe’ natura,
jeve p’’e vascetielle e pp’’e bbarracche,
se rusecava matarazze e mmure
‘e chi teneva ‘e surece ‘int’’e ssacche.

Ma chilli puverielle,grazie a Dio,
a stiente remmeriavano quaccosa;
cu ‘o ppoco ‘e bbroro e ‘o ppoco ‘e fantasìa
mettevano ‘int’’o nniro ‘o ppoco ‘e rosa.

Quann’era vierno, attuorno a’ nu vrasiere,
se raccuntava quacche ffattariello;
fra tutt’’e cunte ‘e chelli bbelli ssere,
me rimmanette ‘mpresso ‘o munaciello.

Gnorsì, ve parlo ‘e chillu spiritillo
ca se diceva ch’era bravo assaje;
io l’aspettavo sempe ‘a piccerillo,
ma a casa mia nun nce veneva maje.

Chisà pecché po’ a casa ‘e Margherita
quaccuno malignanno susteneva,
ca appena se n’asceva suo marito,
‘o munaciello tanno accumpareva.

Cert’è ca chella ‘int’ a’ nu par’’e mise
pigliaje ll’atteggiamento ‘e ‘na papessa;
cagnava tutt’’e juorne ‘na cammisa
e ddeve ‘e sòrde a’ ggente cu ‘o ‘nteresse.

Era nu spiritillo benestante
ca refrescava spisso a Margherita,
spassannese ‘int’’o lietto a ffa ll’amante
‘nfì a cché nun fuje ‘ncucciato da’’o marito.

Po’ quanno chella ‘mpesa jette ‘o spitale
cu ‘a capa rotta e cchin’’e patanielle,
ll’addimannajene:-” Chi t’ha fatto male?”
Essa lle rispunnette…” ‘O munaciello!”

E ‘nquant’ a’’o spiritillo mo v’’o ddico,
pecché a mmità ‘na storia nun se lascia;
sicuramente avette ‘a cagnà vico
e gghiette a rrefrescà quacch’atu vascio